Playoffeko laugarren partida intentsitate handiz hasten zen, 2-2. Lehen abantaila Guuk Gipuzkoak hartzen zuen Nurger eta Jaworskiren saskiraketekin, 9-4 (3. min). Gipuzkoarrek ez zuten abantaila handitzen eta Coruñak partida berdintzen zuen, 11-11 (6. min). Bisitariak lehen aldiz jartzen ziren aurretik markagailuan, 15-16 (7. min). Partida berdinduta zegoen une oro eta lehen laurdena 21-21 bukatzen zen.

Bigarren laurdena lehenengoaren amaiera bezala hasten zen, 23-23 (12. min). Guuk Gipuzkoa Nurgerren lan onarekin markagailuan aurretik jartzen zen berriro, 27-25 (15. min). Guuk Gipuzkoak 7 puntuko aldea lortzen zuen berriz ere konbinazio onekin eta jaworskiren puntuei esker, 36-29 (17. min). Coruña hurbildu nahi zen, baina Guuk Gipuzkoa Motos eta Delasen eskutik atsedenaldira 8 puntuko errentarekin joaten zen, 39-31.

Aldageletatik taldeak bueltan ziren eta Coruñaren erreakzioa iristen zen bi hirukorekin, 2ra jartzeko, 39-37 (22. min). Guuk Gipuzkoaren puntuak Jaworskiren eskutik iristen ziren, 5 goitik jarriz Guuk Gipuzkoak, 45-40 (23. min). Coruña 3 puntura hurbiltzen zen, baina laster iristen zen Lolo Encinasen taldearen erantzuna Jaworski eta Oroz-en puntuei esker, 57-50 (28. min). Jaworskiren eta Delas puntuekin 9 puntuko aldea zeukan etxeko taldeak hirugarren laurdenaren amaieran, 65-56.

Azken hamar minutuak Anderren saskiratzearekin hasten ziren eta 11 puntuko aldea lortzen zuten, 67-56. Kolpeen trukeak aurretik mantentzen zuen Guuk Gipuzkoa laurdenaren erdian, 76-63 (36. min). Coruñak estutzen zuen partida eta bi puntutan jartzen zuen aldea minutu baten faltan, 78-76. Anderrek hiruko erabakigarri batekin 5 puntuko aldea jartzen zuen Guuk Gipuzkoarentzat. Partida 82-77ko emaitzarekin amaitzen zen eta lauko finalerako txartela lortzen zuen Lolo Encinasen taldea.

Final Four-a ekainaren 17 eta 18an jokatuko da, baina oraindik ez da konfirmatu non izango da. Guuk Gipuzkoak badaki finalaurreko aurkaria Hereda San Pablo Burgos izango dela.