Historia

20 urte baino gehiagoko historia, helburu batekin:
Gipuzkoako saskibaloiaren etxea izatea.

HASTAPENAK

2001ean, Vicente Mozok, Gorka Ramonedak, Ramón Santamaríak eta Miguel Santosek Gipuzkoa Basket proiektua sustatu zuten. Klubaren historiako lehen denboraldia 2001/2002koa izan zen. Gasca kiroldegia Gipuzkoako saskibaloiaren etxe bihurtu zen, eta helburu bakar bat zuen –saskibaloiari Gipuzkoan merezi zuen lekua ematea berriz– proiektuari hasiera eman zitzaion.

Ondorengo bi denboraldietan klubak ez zuen talde profesionala mantentzea lortu. Dena den, klubaren sortzaileek proiektuan sinesten jarraitzen zuten, eta, 2004/2005 denboraldian, proiektua birsortu egin zen.

ACB-RA IGOTZEA

Kluba lehiaketara itzuli zenean, LEB-2n aritu ziren; bigarren amaitu zuten liga erregularrean. Igoerako play offetan La Lagunak kanporatu egin zuen Gipuzkoa Basket. Une hartan, Zuzendaritza Batzordeak Algecirasen LEB1eko postuaren erosketa abalatzea erabaki zuen.

LEB-1en jokatutako 2005/2006 denboraldia mugarria izan zen klubaren historian. Gizarte-mailan, zale gehiago lortu ziren eta, kirol-mailan, taldeak bosgarren postuan amaitu zuen liga erregularra; ondorioz, play offa joka zezakeen. Taldeak partida ederrak jokatu zituen eta ACBra igo zen León garaitu ostean –egun markatua hura klubaren historian–.

ACBra igotzearekin batera, Illunbe Gipuzkoa Basketen etxe berri bilakatu zen. Kategoria horretan egon zen lehen urtean, talde gipuzkoarra ACBko bazkide gehien zituen eta publiko gehien zuen bigarren taldea izan zen. Babesa bai, baina taldeak ez zuen mailari eustea lortu eta LEB1era itzuli zen.

BIGARREN IGOERA

Taldea LEBera itzultzean, liga erregular on bat eginda, play offa jokatzeko aukera izan zuen. Gipuzkoa Basket Cáceresera iritsi zen LEB-1eko historiako lehen play offa jokatzeko. Taldearen dinamika goranzkoa zen eta, finalerdietan Breogán eta finalean Tenerife garaitu ondoren, klubaren historiako bigarren igoera lortu zen. Jokalari haien artean, klubeko hiru izen handi izan ziren protagonista handiak: David Doblas, Andy Panko eta Ricardo Úriz.

Kluba ACBra itzuli zenean (2008/2009 denboraldian), honako hauek lortu zituen: taldeak mailari eustea, 7.000 abonatuko oinarria, proiektuarekin inplikatutako 100 enpresa baino gehiago eta 8.000 laguneko batez besteko asistentzia. Denboraldi horretan eta hurrengoan, taldeak kategoria horretan mantentzea lortu zuen. Sailkapeneko hamalaugarren postuan amaitu zuen bi denboraldietan.

DENBORALDI HISTORIKOA

Gipuzkoa Basketen historian, denboraldi arrakastatsuena 2011/2012koa izan zen. Hasiera zaila izan arren, taldeak berehala lortu zuen saskibaloi-maila bikaina. Horri esker, saskibaloiko arratsalde ahaztezinak bizi izan ziren. Bartzelonako Errege Koparako sailkapena eta Valentziaren aurka play offa jokatzea lortu zen, baina ezin izan zen irabazi: hirugarren partidan galdu egin zen. Denboraldiari amaiera bikaina eman ziona Andy Pankori denboraldiko MVP aitorpena egitea izan zen. Denboraldi hartan, sheriffak 19 puntu lortu zituen batez beste partidako.

HIRUGARREN URTEA LEB-EN
HIRUGARREN IGOERA

Europan sailkatzea lortu ondoren, klubak ez zuen kirol-egonkortasunari eustea lortzen, eta hainbat urte zail etorri ziren atzetik. 2015/2016 denboraldian Gipuzkoa Basket mailaz jaitsi zen eta Urrezko LEB ligan lehiatzera itzuli zen. Taldeak etxeko partidak José Antonio Gasca kiroldegian jokatzeari ekin zion berriz ere. Denboraldi bikain baten ondoren, taldeak, beste behin, igotzea lortu zuen, bere fase erregularrean Urrezko LEB ligako txapeldun bihurtu ostean.

ACBra itzultzean, kirol-errendimendua esperotakoa baino handiagoa izan zen, eta mailari eustea lortu zuten liga hamahirugarren postuan amaituta. Hurrengo denboraldian, 2017/2018koan, ez zuten lortu bigarren urtez jarraian mailari eusteko helburua betetzea.

PRINTZESA KOPA ETA IGOERA

2019/2020 denboraldian, Kluba Urrezko LEB ligara itzuli zen. Gipuzkoarren talentuaren aldeko apustua egin zen taldean, eta klubaren historian bi lorpen handi eskuratzea ekarri zuen nortasuna lortu zen: alde batetik, Printzesa Kopa, finalean Valladolid mendean hartu ondoren, eta, bigarrenik, ACBra itzultzea, denboraldi bikain baten ondoren.

PANDEMIA IRISTEN DA

Hurrengo denboraldia –horretan ere Gipuzkoako DNAri eutsi zitzaion– pandemiak markatu zuen. 2020/2021 denboraldia ateak itxita jokatutako partidek eta pandemiak eragindako zailtasun ekonomikoek markatu zuten. Azken unera arte lehiatu arren, ez zen mailari eustea lortu.

GIPUZKOAKO DNA DUEN
PROIEKTU BERRIA

Jaitsieraren ondoren, klubak Gipuzkoako saskibaloiaren aldeko apustuarekin jarraitzea erabaki zuen. 20 urteko historian bigarren aldiz, probintziako entrenatzaile nagusi bat kontratatu zen, eta urrats garrantzitsuak eman dira Gipuzkoa Basket Gipuzkoako saskibaloiaren etxe bihurtzeko. Easorekin akordio historiko bat lortu zen eta lurraldeko hainbat klubekin hitzarmenak sinatu ziren.

Gipuzkoako saskibaloiaren piramidea izateko helburu berarekin ekin zitzaion 2021/2022 denboraldiari, non probintziako sei jokalari lehen taldearen dinamikan baitzeuden. Kirol-mailan, play offera sailkatzeko helburua lortu zen. Final-laurdenetan zoragarri aritu ziren eta Basquet Coruña kanporatu zuten, liga erregularra hirugarren postuan bukatu zuena. Lorpen horren ondoren, Final Four-ean azken uneraino gogor jokatu zuten San Pablo Burgosen aurka, baina Gipuzkoa Basketek porrot egin zuen eta ACBra itzultzeko bi partidatara geratu zen.