Pasa den ostiralean Lleidan denboraldia hasi ondoren, igande honetan, 17:00etan airera botako da baloia lehen aldiz ikasturte honetan Angulas Aguinaga Arenan.

Uda luze batez zain egon ondoren eta joan den asteburuan denboraldia hasi eta gero, Angulas Aguinaga Arena saskibaloi arratsalde magikoen lekuko izango da aurten ere. Aurten, Donostiako kantxaren espiritua berpiztea eta gure feudoa Gipuzkoako saskibaloiaren zaleen topagune bihurtzea da helburua. Klubaren historian egindako abonatu kanpainarik handiena abiatu ostean -abonatu bakoitzak hiru sarrera jasotzen ditu doan denboraldiko partida bakoitzerako- igande honetan amaituko da prozesua zaleak kantxara iristean.

Iragan ostiraleko ezbeharra gainditzeko gogoz dator taldea. Partida oso parekatua izan zen eta azken laurdenaren amaieran ezin izan zion erritmoari eutsi eta Lleidan porrota jaso zuen. Mikel Odriozolak jokalari guztiak ditu eskuragai, Aitor Zubizarretaren baja luzea izan ezik. Nahiz eta erritmoa hobetzen joaten ari dela, Odriozolak ez du ezkutatzen “ekipoa oraindik eraikitzen ari dela” eta horrek “egokitzeko denbora gehiago behar duela”.

Igandeko aurkaria Grupo Ureta Tizona Burgos izango da. Burgoseko taldea, ikasturte honetan San Pablo Burgos taldearekin batera arituko dena maila berdinean, LEB Plata mailatik igotzetik dator joan den denboraldian, jaitsi eta bi urtera. LEB Oro Ligara itzulera ezin hobea izan zen, Valladolidi sei goitik gailendu baitzitzaizkion, 92 puntura iritsiz. Aurreko denboraldian igoera lortu zuen talde gaztea mantentzen da eta, horrez gain, Oscar Alvarado, Arnau Parrado edo Ramon Vilá bezalako jokalari ezagunen fitxaketekin indartu da. Azken honek, izan ere, 20 puntu sartu zituen azken partidan. Mikelen hitzetan, “talde hau oso ona da, jendeak uste duena baino askoz hobea eta gogaikarria izango da”.

Zaleekin lehen topaketa izango da hain ilusionagarria izango den denboraldi berri honetan. Taldeak dena emango du kantxan, gero eta zale gehiagok bete ditzaten Angulas Aguinaga Arenako harmailak. Igandean denok pabiloira! Goazen Guuk Gipuzkoa Basket!