Gaur goizean Angulas Aguinaga Arenako prentsa aretoan José Luis Zubizarreta “Xubi” agertu da, taldeko Kirol Zuzendaria, Urrezko LEB mailako 2023/2024 denboraldiko lehen itzuliaren balorazioa egiteko.

Lehenik eta behin, Gipuzkoa Basket erakunde bezala aipatu du. Xubi oso eskertuta eta pozik agertu da klubeko zuzendaritzarekin. “Klubetik egiten ari denak meritu handia du. Lan egiteko gogoa eta gaitasun ikaragarria duen jendea aurkitu dut hemen. Gipuzkoako saskibaloiarentzat galera larria izango litzateke kluba zuzentzen duen jendeak proiektu honetan ilusioa galtzea”.

Kirol arloari dagokionez, Xubik esan duenez, “argi neukan lehenengo gauza entrenatzaile bat kontratatzea zela, eta hortik aurrera taldea eraikitzea”. Entrenatzaileari buruz esan duenez, “Mikelen apustua nik argi nuen, nik Iraurgin ikusi dut eta entrenatzaile bikaina da, batez ere talde kudeaketari dagokionez”. Jokalarien taldeari dagokionez, honako hau azpimarratu du: “ez dago posiziorik ligako beste talde baten ordez aldatuko nukeen posturik. Ez basean, ez bian, ez hiruan, ez lauan, ez bostean. Ez dut talde bezala gurea baino hobea den talderik ikusten “.

Gizarte mailan, Xubik esan du “jendea pozik dagoela eta gero eta gehiago datorrela”. Gainera, ikusleei buruz esan duenez, “nik nahiago ditut 3.500 ikusle eta bederatzigarren postuan amaitu, final fourrerako sailkatzea baino, eta 1.800 ikusle ekartzea”. Gainera, “saskibaloiarekin ilusionatuta dauden herrietatik txandaka ekartzen ari garen jendea oso pozik dago, lurralde mailan transmititzen ari garena gauza polita da. Haiengana hurbiltzen ari gara. Ahaleginak egiten ari gara klubekin hitzarmenak egiteko. Helburua kilometro 0 gehiago izatea da, guk Gipuzkoan sinestea, eta Gipuzkoak benetan sinesten dugula jakitea”.

Azkenik, zera gaineratu nahi izan du: “play offeko taldea ez garen gauza bakarra instalazioetan da. Badakit lanean ari direla, baina jendea erakartzeko, zerbait egokiagoa eskatu beharra daukagu”.